నల్లగొండలో రైతు సంఘం మహాసభలు: పోస్టర్ ఆవిష్కరణ

నల్లగొండ జిల్లా కేంద్రంలో ఈనెల 15న జరగనున్న అఖిల భారత రైతు సంఘం 36వ జాతీయ మహాసభల సందర్భంగా నిర్వహించే బహిరంగ సభను జయప్రదం చేయాలని తెలంగాణ మత్స్యకారులు, మత్స్య కార్మిక సంఘం జిల్లా కన్వీనర్ తేలు ఇస్తారి పిలుపునిచ్చారు.

ఈనెల 15వ తేదీన నల్లగొండ జిల్లా కేంద్రంలో జరిగే అఖిల భారత రైతు సంఘం () 36వ జాతీయ మహాసభల సందర్భంగా నిర్వహించనున్న భారీ బహిరంగ సభను జయప్రదం చేయాలని తెలంగాణ మత్స్యకారులు, మత్స్య కార్మిక సంఘం జిల్లా కన్వీనర్, మాజీ జిల్లా డైరెక్టర్ తేలు ఇస్తారి పిలుపునిచ్చారు. ఈరోజు ఐనాపూర్ బజార్ లోని అంబేద్కర్ విగ్రహం వద్ద రైతు సంఘం బహిరంగ సభ గోడ పోస్టర్లను ఆయన ఆవిష్కరించారు.

కేంద్ర, రాష్ట్ర ప్రభుత్వాలపై విమర్శలు

ఈ సందర్భంగా తేలు ఇస్తారి మాట్లాడుతూ, కేంద్రంలోని బీజేపీ నరేంద్ర మోడీ ప్రభుత్వం రైతాంగ వ్యతిరేక విధానాలు అవలంబిస్తుందని విమర్శించారు. విదేశీ వస్తువుల దిగుమతులకు అనుమతి ఇచ్చి మన దేశ రైతాంగాన్ని నడ్డి విరిచే విధంగా చేస్తుందన్నారు. తక్కువ ధరకు విదేశీ సరుకులు రావడం వల్ల మన దేశంలో పండించే పంటలకు అధిక పెట్టుబడి పెట్టి రైతులు దివాలా తీస్తున్నారని, దానితో రైతన్నల ఆత్మహత్యలు పెరిగిపోతున్నాయని ఆవేదన వ్యక్తం చేశారు. కేంద్ర ప్రభుత్వం పెంచిన కాంప్లెక్స్ ఎరువుల ధరలను వెంటనే తగ్గించాలని, రైతులకు సబ్సిడీపై ఉపయోగపడే పరికరాలు అందించాలని డిమాండ్ చేశారు.

రాష్ట్ర ప్రభుత్వంపై విమర్శలు గుప్పిస్తూ, ఎల్ నినో ప్రభావం రాష్ట్రంలో ఉంటుందని తెలిసి కూడా సకాలంలో ప్రాజెక్టులు నింపకపోవడం వల్ల భూగర్భ జలాలు అడుగంటి, రాష్ట్రంలో తాగు, సాగు నీటి సమస్యలు వస్తున్నాయన్నారు. ఆరుతడి పంటలు పెట్టుకోవాలని ప్రచారాలు చేస్తున్న ప్రభుత్వం, కోతుల బెడద గురించి పట్టించుకోవడం లేదన్నారు. మనుషులు బయట కనబడితేనే కోతులు దాడి చేస్తున్న పరిస్థితిలో, ఆరుతడి పంటలు పెడితే ఆ పంటలకు రక్షణ ఏదని ప్రశ్నించారు. ఇప్పటికైనా రాష్ట్ర ప్రభుత్వం గొప్పలు చెప్పడం మాని, రైతాంగ సమస్యలపై రైతులకు ఉపయోగపడే నిర్ణయాలు చేయాలని సూచించారు.

మహాసభల లక్ష్యాలు

ఈ మహాసభలకు దేశంలోని అన్ని రాష్ట్రాల నుండి ప్రతినిధులు హాజరై, దేశంలో రైతన్నలు ఎదుర్కొంటున్న సమస్యలపై చర్చించి, భవిష్యత్తులో రైతులకు ఉపయోగపడే విధంగా రైతాంగ పోరాటాలకు రూపకల్పన చేస్తారని తెలిపారు. ఈనెల 15న జరిగే భారీ బహిరంగ సభకు ఆల్ ఇండియా నాయకురాలు బృందా కరత్ మరియు రైతాంగ నాయకులు హాజరవుతారని తెలిపారు. ఈ బహిరంగ సభకు పార్టీలకు అతీతంగా రైతులు, వ్యవసాయ కూలీలు, వృత్తిదారులు, కార్మికులు అధిక సంఖ్యలో పాల్గొని బహిరంగ సభను జయప్రదం చేయాలని విజ్ఞప్తి చేశారు.

ఈ కార్యక్రమంలో వ్యవసాయ కార్మిక సంఘం మండల అధ్యక్షులు పుల్లంపల్లి సాయిలు, కానుగుల రాజు, సున్నం యాదగిరి, కాగితా ఆగం రెడ్డి, ఏనుగుల శీను, తేలు కనకయ్య, మల్లం అంజయ్య, దండు బాలనర్సు, లెనిన్ రాకేష్, రాచకొండ నాగయ్య, కుక్కల నాగరాజు, నవీన్ తదితరులు పాల్గొన్నారు.