దేశవ్యాప్తంగా ఆసుపత్రుల్లో వైద్య చికిత్సల ధరలు, అందించే సేవలకు సంబంధించిన ఛార్జీలను రోగులకు స్పష్టంగా కనిపించేలా ప్రదర్శించాలని కేంద్ర ఆరోగ్య, కుటుంబ సంక్షేమ మంత్రిత్వ శాఖ రాష్ట్రాలు, కేంద్రపాలిత ప్రాంతాలను కోరింది. చికిత్సకు ఎంత ఖర్చవుతుందో ముందుగానే తెలుసుకునే అవకాశం కల్పించడం, ఆసుపత్రి బిల్లుల విషయంలో గందరగోళాన్ని తగ్గించడం ఈ చర్య ప్రధాన ఉద్దేశం.
ఈ మేరకు కేంద్ర ఆరోగ్య శాఖ కార్యదర్శి పుణ్య సలిల శ్రీవాస్తవ అన్ని రాష్ట్రాలు, కేంద్రపాలిత ప్రాంతాల ప్రధాన కార్యదర్శులకు లేఖ రాశారు. అదే సమయంలో వైద్య పరికరాల పరిశ్రమ కూడా చికిత్స సమయంలో ఉపయోగించే పరికరాలు, మందులు, ఇతర వైద్య సామగ్రి ధరల విషయంలో మరింత పారదర్శకత ఉండాలని కోరుతోంది. ఆసుపత్రి సేవల ఛార్జీలతో పాటు వైద్య పరికరాల కొనుగోలు ధరలు, గరిష్ఠ చిల్లర ధర, రోగుల నుంచి వసూలు చేస్తున్న మొత్తాలు కూడా స్పష్టంగా తెలియాలని పరిశ్రమ ప్రతినిధులు సూచిస్తున్నారు.
ఆసుపత్రుల్లో ధరల పట్టికలు స్పష్టంగా కనిపించాలి
కేంద్ర ఆరోగ్య శాఖ సూచనల ప్రకారం, క్లినికల్ ఎస్టాబ్లిష్మెంట్స్ పరిధిలోకి వచ్చే ఆసుపత్రులు, క్లినిక్లు, ఇతర వైద్య సంస్థలు అందించే సేవలు, సదుపాయాలకు సంబంధించిన ధరలను ప్రముఖంగా ప్రదర్శించాలి. సంబంధిత చట్టం వర్తించే ప్రాంతాల్లో ఈ వివరాలు స్థానిక భాషతో పాటు ఆంగ్లంలోనూ రోగులకు అందుబాటులో ఉండాలి.
క్లినికల్ ఎస్టాబ్లిష్మెంట్స్ (రిజిస్ట్రేషన్ అండ్ రెగ్యులేషన్) చట్టం, 2010, దానికి సంబంధించిన 2012 నిబంధనలు ఈ విషయంలో మార్గదర్శకాలను అందిస్తున్నాయి. ఈ చట్టం వర్తించని రాష్ట్రాల్లో ఆయా రాష్ట్రాల చట్టాలు, నిబంధనల ప్రకారం వైద్య సంస్థలపై నియంత్రణ ఉంటుంది. ఆయా ప్రాంతాల్లో అమల్లో ఉన్న నిబంధనలను సమీక్షించి, ధరల ప్రదర్శన సక్రమంగా అమలయ్యేలా చూడాలని కేంద్రం కోరింది.
చికిత్సకు ముందే ఛార్జీల వివరాలు అందుబాటులో ఉంటే రోగులు, వారి కుటుంబ సభ్యులు వైద్య ఖర్చులను అంచనా వేసుకోవచ్చు. అందుబాటులో ఉన్న ఆర్థిక వనరులను బట్టి చికిత్సకు సంబంధించిన నిర్ణయాలు తీసుకోవచ్చు. అంతేకాకుండా బిల్లుల్లో ఊహించని ఖర్చులు కనిపించినప్పుడు తలెత్తే వివాదాలను తగ్గించేందుకు కూడా ఇది సహాయపడుతుంది.
వైద్య పరికరాల ధరలపై పరిశ్రమ డిమాండ్
ఆసుపత్రుల్లో సేవల ధరల ప్రదర్శనకు సంబంధించిన కేంద్రం చర్యను అసోసియేషన్ ఆఫ్ ఇండియన్ మెడికల్ డివైస్ ఇండస్ట్రీ (ఏఐఎంఈడీ) స్వాగతించింది. అయితే, చికిత్సలో ఉపయోగించే వైద్య పరికరాలు, ఇంప్లాంట్లు, ఇతర వినియోగ సామగ్రి ధరల వివరాలను కూడా రోగులకు తెలియజేయాలని సంస్థ కోరింది.
వైద్య పరికరాలు తయారీదారుల నుంచి పంపిణీదారులు, విక్రయదారుల వరకు చేరే క్రమంలో ధరలు ఎలా మారుతున్నాయో రోగులకు అర్థమయ్యేలా సమాచారం అందుబాటులో ఉండాలని పరిశ్రమ ప్రతినిధులు అభిప్రాయపడుతున్నారు. ఒక వైద్య పరికరాన్ని ఆసుపత్రి ఎంత ధరకు కొనుగోలు చేసింది, దాని గరిష్ఠ చిల్లర ధర ఎంత, చివరకు రోగి నుంచి ఎంత వసూలు చేశారు అనే వివరాలు స్పష్టంగా ఉంటే బిల్లులపై అవగాహన పెరుగుతుందని పేర్కొంటున్నారు.
