సిద్దిపేట, 16 November
ముఖ్యమంత్రి రేవంత్రెడ్డి సిద్దిపేటలో అడుగుపెట్టే ముందు అర్హులైన వారందరికీ పింఛన్లు మంజూరు చేయాలని బీఆర్ఎస్ పట్టణ అధ్యక్షుడు కొండం సంపత్రెడ్డి డిమాండ్ చేశారు. ఈ నెల 19న ముఖ్యమంత్రి పర్యటన నేపథ్యంలో సిద్దిపేట మున్సిపల్ అధికారులు హడావుడిగా పింఛన్ల పంపిణీకి ఏర్పాట్లు చేస్తున్నారని ఆయన విమర్శించారు. గత మూడేళ్ల కాంగ్రెస్ పాలనలో కొత్తగా ఒక్క పింఛన్ కూడా మంజూరు చేయకుండా, ఇప్పుడు 850 మందికి పింఛన్లు ఇస్తున్నట్లు ప్రచారం చేసుకోవడం ఏమిటని ఆయన ప్రశ్నించారు.
జిల్లా కేంద్రంలో నిర్వహించిన విలేకరుల సమావేశంలో ఆయన మాట్లాడారు. ఇటీవల సిద్దిపేట మున్సిపల్ అధికారులు రీ వెరిఫికేషన్, వేలిముద్రల సేకరణ పేరుతో పింఛన్లపై సర్వే నిర్వహించారని సంపత్రెడ్డి తెలిపారు. ఈ ప్రక్రియలో మరణించినవారు, అనర్హుల పేర్లతో సుమారు 850 పింఛన్లను తొలగించినట్లు ఆయన ఆరోపించారు. ఇప్పుడు ముఖ్యమంత్రి సభను దృష్టిలో పెట్టుకొని అదే 850 మందికి తిరిగి పింఛన్లు మంజూరు చేస్తున్నట్లు కాంగ్రెస్ ప్రభుత్వం ప్రచారం చేసుకుంటోందని విమర్శించారు. పాత పింఛన్లనే కొత్తగా మంజూరు చేసినట్లు చూపించడం ప్రజలను మభ్యపెట్టడమేనని ఆయన అన్నారు.
పేదలకు అండగా నిలవాలనే ఉద్దేశంతో కేసీఆర్ ప్రభుత్వం ఆసరా పథకాన్ని అమలు చేసి లక్షలాది మందికి పింఛన్లు అందించిందని ఆయన గుర్తుచేశారు. కేసీఆర్ హయాంలో సిద్దిపేట మున్సిపాలిటీ పరిధిలో 13,700 పింఛన్లు ఉండేవని, ప్రస్తుతం కూడా దాదాపు అదే సంఖ్య కొనసాగుతోందని పేర్కొన్నారు. కాంగ్రెస్ ప్రభుత్వం అధికారంలోకి వచ్చిన తర్వాత కొత్తగా ఒక్క పింఛన్ కూడా మంజూరు చేయలేదని ఆయన ఆరోపించారు. 36 నెలలుగా అర్హులు పింఛన్ల కోసం ఎదురుచూస్తున్నారని ఆయన తెలిపారు.
సిద్దిపేట పట్టణంలో ఇప్పటికే సుమారు 1,200 పింఛన్ దరఖాస్తులు ఆన్లైన్లో పెండింగ్లో ఉన్నాయని సంపత్రెడ్డి వెల్లడించారు. ప్రభుత్వం కొర్రీలు పెడుతూ అర్హులకు పింఛన్లు అందకుండా చేస్తోందని ఆయన విమర్శించారు. ముఖ్యమంత్రి సభకు ముందు హడావుడి చేయడం కాకుండా, పెండింగ్లో ఉన్న దరఖాస్తులన్నింటినీ పరిశీలించి అర్హులైన వారికి పింఛన్లు మంజూరు చేయాలని ఆయన డిమాండ్ చేశారు. వృద్ధాప్య, బీడీ కార్మికుల పింఛన్లను కూడా వెంటనే మంజూరు చేయాలని ఆయన కోరారు. సిద్దిపేటలో ముఖ్యమంత్రి పర్యటన సందర్భంగా ప్రజల నుంచి వ్యతిరేకత వస్తుందనే భయంతోనే కాంగ్రెస్ ప్రభుత్వం పింఛన్ల పంపిణీ అంశాన్ని తెరపైకి తీసుకొస్తోందని ఆయన ఆరోపించారు. ప్రజలు ఇలాంటి ప్రచారాలను నమ్మే పరిస్థితిలో లేరని ఆయన అన్నారు.







