జనగామ, 15 November
గిరిజనుల ఆత్మగౌరవం
భగవాన్ బిర్సా ముండా జయంతి సందర్భంగా జిల్లా కలెక్టర్ కార్యాలయంలో వేడుకలను ఘనంగా నిర్వహించారు. ఈ కార్యక్రమంలో జిల్లా కలెక్టర్ సందీప్ కుమార్ ఝా, జిల్లా స్థాయి అధికారులు, గిరిజన బంజారా నాయకులు, ప్రజాప్రతినిధులు పాల్గొన్నారు. ఈ సందర్భంగా భగవాన్ బిర్సా ముండా చిత్రపటానికి కలెక్టర్, అధికారులు, గిరిజన నాయకులు పూలమాలలు వేసి నివాళులర్పించారు.
ఈ సందర్భంగా కలెక్టర్ సందీప్ కుమార్ ఝా మాట్లాడుతూ, భగవాన్ బిర్సా ముండా గిరిజనుల హక్కులు, భూమి, అడవులు, నీటి వనరుల పరిరక్షణ కోసం బ్రిటిష్ పాలకులకు వ్యతిరేకంగా పోరాడిన గొప్ప స్వాతంత్ర్య సమరయోధుడని కొనియాడారు. ఆయన త్యాగం, పోరాట స్ఫూర్తి తరతరాలకు ఆదర్శమని పేర్కొన్నారు. జల్జంగల్జమీన్ పరిరక్షణ కోసం ఆయన సాగించిన పోరాటం గిరిజన సమాజానికి ఎప్పటికీ స్ఫూర్తిదాయకమని అన్నారు. గిరిజనుల ఆత్మగౌరవం, ఐక్యత, సంస్కృతి, సంప్రదాయాలను కాపాడుకుంటూ ఆయన ఆశయాలను భావితరాలకు అందించాలని పిలుపునిచ్చారు.
అనంతరం గిరిజన బంజారా రాష్ట్ర, జిల్లా నాయకులు మాట్లాడుతూ, భగవాన్ బిర్సా ముండా ఆశయ సాధన కోసం గిరిజన సమాజమంతా ఐక్యంగా ముందుకు సాగాలని అన్నారు. గిరిజనుల హక్కుల పరిరక్షణతో పాటు తండాల అభివృద్ధి, విద్య, ఉపాధి, సామాజిక చైతన్యానికి ప్రాధాన్యత ఇవ్వాలని పేర్కొన్నారు. ఆయన పోరాట పటిమ, త్యాగనిరతిని యువత ఆదర్శంగా తీసుకొని గిరిజన సమాజ అభ్యున్నతికి కృషి చేయాలని పిలుపునిచ్చారు.
