రికార్డుల నమోదుపై సీఐ భాస్కర్ ఆగ్రహం
యాదాద్రి జిల్లా యాదగిరిగుట్ట పట్టణంలోని పలు లాడ్జీలపై పోలీసులు ఆకస్మిక తనిఖీలు నిర్వహించారు. పట్టణ సీఐ భాస్కర్ ఆధ్వర్యంలో చేపట్టిన ఈ తనిఖీల్లో లాడ్జీల నిర్వహణలో పలు లోపాలను గుర్తించారు. లాడ్జీలకు వచ్చే అతిథుల వివరాలను నిబంధనల ప్రకారం రికార్డుల్లో నమోదు చేయకపోవడంపై పోలీసులు అసహనం వ్యక్తం చేశారు. గతంలో పలుమార్లు హెచ్చరించినప్పటికీ, కొందరు లాడ్జీల నిర్వాహకులు నిబంధనలు పాటించకపోవడాన్ని తీవ్రంగా పరిగణించారు.
చట్టపరమైన చర్యలు తప్పవని హెచ్చరిక
ఈ సందర్భంగా సీఐ భాస్కర్ మాట్లాడుతూ, లాడ్జీల నిర్వాహకులు తప్పనిసరిగా అతిథుల వివరాలను రికార్డుల్లో నమోదు చేయాలని సూచించారు. పోలీసుల ఆదేశాలను, నిబంధనలను నిర్లక్ష్యం చేస్తూ సరైన రికార్డులు నిర్వహించని లాడ్జీలపై చట్టపరమైన చర్యలు తీసుకుంటామని హెచ్చరించారు. ఈ తనిఖీల్లో ఎస్ఐలు యాదయ్య, ప్రసాద్ తో పాటు పోలీసు సిబ్బంది పాల్గొన్నారు.
