ప్రముఖ నటి అంబిక, ఆమె సోదరి రాధ మధ్య ఆస్తి వివాదం తీవ్రస్థాయికి చేరింది. తనపై రాధ చేసిన దొంగతనం ఆరోపణలను అంబిక తీవ్రంగా ఖండించారు. రూ.46 కోట్ల లావాదేవీకి ఖాళీ చెక్కులు వాడారని రాధ చెన్నై పోలీస్ కమిషనర్కు ఫిర్యాదు చేశారు.
తనను దొంగగా చిత్రీకరించడం ఎంతో బాధ కలిగించిందని నటి అంబిక ఆవేదన వ్యక్తం చేశారు. చిన్నతనం నుంచే కుటుంబం కోసం ఎంతో కష్టపడ్డానని, అలాంటి తనపై దొంగతనం ఆరోపణలు చేయడం తీవ్రంగా బాధించిందని ఆమె అన్నారు.
రాధ తన వ్యక్తిగత వస్తువుల విషయంలో ఎంతో జాగ్రత్తగా ఉంటారని, నంబర్ లాక్ ఉన్న బ్యాగులను ఉపయోగిస్తారని.. అలాంటిది తాను ఆమె గది నుంచి చెక్కులు దొంగిలించానని చెప్పడం అసంబద్ధమని అంబిక వ్యాఖ్యానించారు. రాధ చెన్నై పోలీస్ కమిషనర్కు ఇచ్చిన ఫిర్యాదులో.. తన ఇంట్లో ఉన్న సంతకం చేసిన ఖాళీ చెక్కులను అంబిక, సోదరుడు మల్లికార్జున్ తీసుకుని దాదాపు రూ.46 కోట్ల విలువైన లావాదేవీకి ఉపయోగించేందుకు ప్రయత్నించారని ఆరోపించారు.
ఈ వివాదానికి ప్రధాన కారణం ఏఆర్ఎస్ గార్డెన్ ఆస్తి అని అంబిక తెలిపారు. ఆ ఆస్తిని తాను కష్టపడి సంపాదించిన డబ్బుతో నిర్మించానని, దానికి దివంగత ఎంజీఆర్ సూచనలతో పేరు పెట్టినట్లు తెలిపారు. ఆ తర్వాత ఆస్తి పేరును మార్చడం, తనకు రావాల్సిన వాటా ఇవ్వకపోవడంతో న్యాయపోరాటం చేయాల్సి వచ్చిందని వెల్లడించారు.
కుటుంబ సమస్యను కుటుంబ సభ్యుల మధ్యే పరిష్కరించుకోవడానికి తాము గతంలో పలుమార్లు ప్రయత్నించామని అంబిక తెలిపారు. తమ తల్లి కూడా సోదరీమణులు ఐక్యంగా ఉండాలని కోరుకునేవారని గుర్తుచేశారు. సమస్యను చర్చల ద్వారా పరిష్కరించుకునే అవకాశం ఉంటే తాను, తన సోదరుడు సిద్ధంగా ఉన్నామని తెలిపారు.
ప్రస్తుతం ఈ వ్యవహారం న్యాయపరమైన పరిధిలో ఉన్నందున ఇకపై ఈ అంశంపై బహిరంగంగా ఎక్కువగా మాట్లాడబోనని అంబిక స్పష్టం చేశారు. తనపై వచ్చిన ఆరోపణల విషయంలో పరువునష్టం చర్యలు తీసుకునే అవకాశం ఉందని ఆమె తరఫు న్యాయవాది వెల్లడించారు.
ఈ చెక్కుల వివాదం, ఆస్తి హక్కులపై ఇరువైపులా చేసిన ఆరోపణలు ప్రస్తుతం దర్యాప్తు, న్యాయ ప్రక్రియలో ఉన్నాయి. ఆరోపణలు నిజమా కాదా అన్నది సంబంధిత దర్యాప్తు, కోర్టు ప్రక్రియ ద్వారా తేలాల్సి ఉంది.
