రాప్తాడు ఘటన బాధితురాలిని పరామర్శించనున్న వైఎస్ జగన్ - ఓరుగల్లు న్యూస్

రాప్తాడు పాఠశాలలో శనివారం తరగతి గదిలోకి ప్రవేశించిన ఓ వ్యక్తి కట్టెలు కోసే రంపంతో గోపికపై దాడి చేసినట్లు పోలీసులు తెలిపారు. ఈ ఘటనలో బాలికకు మెడ, పొత్తికడుపు సహా శరీరంలోని పలు భాగాల్లో తీవ్ర గాయాలయ్యాయి. ఆమెను అడ్డుకునేందుకు ప్రయత్నించిన మరో విద్యార్థినికి కూడా గాయాలయ్యాయి. తొలుత లో చికిత్స అందించిన అనంతరం మెరుగైన వైద్యం కోసం గోపికను బెంగళూరులోని మణిపాల్ ఆస్పత్రికి తరలించారు.

11 గంటలపాటు శస్త్రచికిత్స

ఆస్పత్రికి చేరుకునే సమయానికి గోపిక పరిస్థితి విషమంగా ఉండటంతో వైద్యులు పలు విభాగాల నిపుణులతో కలిసి సుమారు 11 గంటలపాటు శస్త్రచికిత్స నిర్వహించారు. రక్తస్రావాన్ని అదుపులోకి తీసుకొచ్చి, బాలిక ఆరోగ్య పరిస్థితిని స్థిరీకరించినట్లు ఆస్పత్రి వర్గాలు వెల్లడించాయి. ప్రస్తుతం ఆమెకు పీడియాట్రిక్ ఐసీయూలో వెంటిలేటర్ సాయంతో చికిత్స అందిస్తున్నారు. కీలకమైన అవయవాల పనితీరును వైద్యులు నిరంతరం పర్యవేక్షిస్తున్నారు. పరిస్థితిని బట్టి మరిన్ని శస్త్రచికిత్సలు అవసరమయ్యే అవకాశం ఉందని తెలిపారు.

మంత్రి లోకేష్ పరామర్శ

ఏపీ విద్యాశాఖ మంత్రి నారా లోకేష్ ఆదివారం బెంగళూరులోని మణిపాల్ ఆస్పత్రికి వెళ్లి గోపికను, ఆమె కుటుంబ సభ్యులను పరామర్శించారు. వైద్యులతో మాట్లాడి చికిత్స వివరాలు తెలుసుకున్నారు. బాధిత కుటుంబానికి ప్రభుత్వం అన్ని విధాలా అండగా ఉంటుందని హామీ ఇచ్చారు. ఈ ఘటనతో భయాందోళనలకు గురైన విద్యార్థులకు మానసిక ధైర్యం కల్పించేందుకు 20 మంది కౌన్సెలర్ల బృందాన్ని ఏర్పాటు చేసినట్లు కూడా తెలిపారు.

ఇదిలా ఉండగా, నిందితుడిని పట్టుకునేందుకు పోలీసులు ప్రత్యేక బృందాలను ఏర్పాటు చేశారు. ఆత్మకూరు అటవీ ప్రాంతం సమీపంలో జరిగిన పోలీసుల కాల్పుల ఘటన అనంతరం నిందితుడిని అదుపులోకి తీసుకున్నట్లు జిల్లా ఎస్పీ వెల్లడించారు. అతడి ఆరోగ్య పరిస్థితి మెరుగుపడిన తర్వాత విచారణ చేపడతామని తెలిపారు.