భద్రాద్రి జిల్లాలో విధి నిర్వహణలో ఉన్న మహిళా ఆర్టీసీ కండక్టర్ ప్రవళికపై టికెట్ చిల్లర వివాదంలో ప్రయాణికురాలి దాడి చేసింది. ఈ ఘటనలో తీవ్రంగా గాయపడిన ప్రవళికకు మెరుగైన వైద్యం అందించడంతో పాటు, అన్ని విధాలా అండగా ఉంటామని తెలంగాణ రాష్ట్ర రోడ్డు రవాణా సంస్థ (టీఎస్ఆర్టీసీ) అధికారులు హామీ ఇచ్చారు.
మణుగూరు ఆర్టీసీ డిపోకు చెందిన కండక్టర్ న మణుగూరు నుంచి భద్రాచలం వైపు వెళ్తున్న పల్లెవెలుగు బస్సులో విధులు నిర్వహిస్తున్నారు. ఈ క్రమంలో మౌనిక అనే మహిళ తన కుమారుడితో కలిసి ప్రయాణించింది. బాలుడి టికెట్ కోసం మౌనిక రూ.100 నోటు ఇవ్వగా, రూ.10 టికెట్ ఇచ్చిన కండక్టర్ మిగిలిన రూ.90 చిల్లరను తర్వాత తీసుకోవాలని సూచించారు. గమ్యస్థానం సమీపంలో చిల్లర విషయంలో మరోసారి వివాదం తలెత్తింది.
ఈ వివాదం తీవ్రమై, మిట్టగూడెం సమీపంలో కదులుతున్న బస్సు నుంచి ప్రవళిక కిందపడిపోయారు. బస్సు వెనుక చక్రాలు ఆమె కాళ్లపై నుంచి వెళ్లడంతో తీవ్ర గాయాలయ్యాయి. వెంటనే ప్రవళికను ఆస్పత్రికి తరలించి, తొలుత స్థానికంగా చికిత్స అందించారు. అనంతరం మెరుగైన వైద్యం కోసం హైదరాబాద్కు తరలించారు.
అధికారుల పరామర్శ, భరోసా
ప్రవళిక ఆరోగ్య పరిస్థితిని తెలుసుకునేందుకు టీజీఎస్ఆర్టీసీ ఎగ్జిక్యూటివ్ డైరెక్టర్ సీహెచ్ వెంకన్న ఆస్పత్రిని సందర్శించారు. వైద్యులతో మాట్లాడి చికిత్స వివరాలు తెలుసుకున్నారు. ప్రవళిక, ఆమె కుటుంబ సభ్యులకు ధైర్యం చెప్పి, సంస్థ తరఫున అవసరమైన సహాయం అందిస్తామని హామీ ఇచ్చారు.
మంత్రి ఖండన, పోలీసుల చర్యలు
ఈ ఘటనను తెలంగాణ రవాణా శాఖ మంత్రి పొన్నం ప్రభాకర్ తీవ్రంగా ఖండించారు. విధుల్లో ఉన్న ఆర్టీసీ సిబ్బందిపై దాడులు సహించబోమని స్పష్టం చేశారు. ప్రవళికకు మెరుగైన వైద్యం అందించాలని, ఘటనకు బాధ్యులైన వారిపై చట్టప్రకారం చర్యలు తీసుకోవాలని అధికారులను ఆదేశించారు. బస్సు డ్రైవర్ ఫిర్యాదు ఆధారంగా అశ్వాపురం పోలీసులు మౌనికపై కేసు నమోదు చేసి, అరెస్టు చేసినట్లు తెలిపారు. ఘటనకు సంబంధించిన దర్యాప్తు కొనసాగుతోంది.
ప్రయాణికులకు మంత్రి సూచన
ప్రజలను సురక్షితంగా గమ్యస్థానాలకు చేర్చేందుకు ఆర్టీసీ సిబ్బంది నిరంతరం పనిచేస్తుంటారని మంత్రి పేర్కొన్నారు. టికెట్, చిల్లర లేదా ఇతర సమస్యలు ఎదురైతే అధికారుల దృష్టికి తీసుకెళ్లాలని, వాగ్వాదాలు హింసకు దారితీయకుండా సంయమనం పాటించాలని సూచించారు. ఈ ఘటన నేపథ్యంలో విధుల్లో ఉన్న సిబ్బంది భద్రతపై మరోసారి చర్చ మొదలైంది.
