అనాథ పిల్లలు, వృద్ధులు, దివ్యాంగులకు జీవితాంతం గౌరవప్రదమైన సంరక్షణ, వైద్యసేవలు అందించే లక్ష్యంతో రిలయన్స్ ఫౌండేషన్ కీలక ప్రాజెక్టుకు శ్రీకారం చుట్టింది. ఫౌండేషన్ ఛైర్పర్సన్ నీతా అంబానీ ఆదివారం నీతా ముఖేశ్ అంబానీ అనంత్ ఆశ్రయ్ పేరుతో ప్రత్యేక సంరక్షణ కేంద్రాన్ని ఏర్పాటు చేయనున్నట్లు ప్రకటించారు. ముంబై సమీపంలోని కర్జాత్లో ఈ ప్రాజెక్టుకు ఆమె భూమిపూజ చేశారు.
సుమారు 100 ఎకరాల విస్తీర్ణంలో, అవసరమైన అనుమతులకు లోబడి పలు దశల్లో ఈ శాశ్వత, లాభాపేక్షలేని ప్రాజెక్టును నిర్మించనున్నారు. ఈ ప్రాజెక్టు ద్వారా అభివృద్ధి సంబంధిత వైకల్యాలు ఉన్నవారు, అనాథ పిల్లలు, వృద్ధులు కలిపి 5,000 మందికి పైగా జీవితాంతం నివాసం కల్పించనున్నారు. వీరితో పాటు సంరక్షకులు, వైద్య నిపుణులు, సహాయక సిబ్బంది, వారి కుటుంబాలతో కలిపి దాదాపు 15,000 మందికి సేవలందించే సమాజంగా దీన్ని తీర్చిదిద్దాలని లక్ష్యంగా పెట్టుకున్నారు.
కుటుంబ వాతావరణంలో ప్రత్యేక సంరక్షణ
ఇది కేవలం ఒక సంరక్షణ సంస్థగా కాకుండా, నివాసితులు రోగులుగా కాకుండా కుటుంబ సభ్యుల్లా, పొరుగువారిలా జీవించే ఆత్మీయ సమాజంగా ఉండనుంది. ఇందులో ఇళ్లు, వీధులు, దేవాలయం, ఆసుపత్రి, ఆటస్థలాలు, ఉద్యానవనాలు, వ్యవసాయ క్షేత్రాలు, వర్క్షాప్లు ఏర్పాటు చేయనున్నారు. నివాసితుల కోసం చిన్న చిన్న కుటుంబ తరహా ఇళ్లను నిర్మించనున్నారు. ప్రతి ఇంటిలో ప్రత్యేకంగా నియమించిన సంరక్షకులు, హౌస్ పేరెంట్స్ ఉంటారు. నివాసితులు తమ గదులను ఫొటోలు, రంగులు, ఇష్టమైన వస్తువులతో తమ అభిరుచికి అనుగుణంగా అలంకరించుకునే అవకాశం కల్పిస్తారు.
వ్యక్తిగత సంరక్షణ ప్రణాళిక
ప్రతి ఒక్కరి అవసరాలను బట్టి వ్యక్తిగత సంరక్షణ, అభివృద్ధి ప్రణాళిక రూపొందిస్తారు. ఇందులో వైద్యం, విద్య, నైపుణ్యాభివృద్ధి, ఉపాధి, స్నేహ సంబంధాలు, వ్యక్తిగత శ్రేయస్సు వంటి అంశాలు ఉంటాయి. ప్రతి ఆరు నెలలకు కనీసం ఒకసారి ఈ ప్రణాళికను సమీక్షిస్తారు. ఈ టౌన్షిప్లో ఎనిమిది నివాస గ్రామాలు ఏర్పాటు చేయనున్నారు. ప్రతి గ్రామానికి భారతదేశంలోని ఒక పవిత్ర నది పేరు పెట్టనున్నారు.
సౌకర్యాలు, సేవలు
గుర్తింపు, స్వతంత్రంగా కదలికలు సులభం కావడానికి ప్రతి గ్రామానికి ప్రత్యేక రంగు, చిహ్నం, సెన్సరీ గార్డెన్ ఏర్పాటు చేస్తారు. ఈ ప్రాజెక్టులో ప్రత్యేక ఆసుపత్రి, ఆధునిక పునరావాస కేంద్రాలు, సమ్మిళిత విద్యా పాఠశాలలు, క్రీడా సదుపాయాలు, జంతువులతో అనుబంధం పెంపొందించే ఫామ్, బేకరీ, కేఫ్, హస్తకళల కేంద్రాలు ఏర్పాటు చేయనున్నారు. అలాగే కుటుంబ సభ్యులకు తాత్కాలిక విశ్రాంతి గృహాలు, మొబైల్ వైద్య క్లినిక్లు, దివ్యాంగుల సంరక్షణ నిపుణుల కోసం జాతీయ శిక్షణ అకాడమీ, ప్రశాంతమైన ఉద్యానవనంతో కూడిన హాస్పిస్ విభాగం కూడా ఉండనున్నాయి.
ఈ కేంద్రంలోని దేవాలయం, ఆసుపత్రి, క్రీడా సదుపాయాలు, కేఫ్లను చుట్టుపక్కల గ్రామాల ప్రజలు కూడా వినియోగించుకునేలా ప్రణాళిక రూపొందించారు. ఈ ప్రాంతానికి చెందిన సుమారు 1,000 మందికి థెరపీ, విద్య, ఉపాధి అవకాశాలు కల్పించాలని భావిస్తున్నారు. అంతేకాకుండా వేలాది మందికి తాత్కాలిక సంరక్షణ, ఆరోగ్య సేవలు, ఇతర సామాజిక కార్యక్రమాల ద్వారా ప్రయోజనం చేకూరనుంది.
భూమిపూజ కార్యక్రమంలో నీతా అంబానీ మాట్లాడుతూ, దివ్యాంగులు, తల్లిదండ్రుల సంరక్షణ అవసరమైన పిల్లలు, ఆదరణ కోరుకునే వృద్ధుల కోసం ప్రేమతో కూడిన ఇంటిని నిర్మించడం తమ కుటుంబానికి ఎంతో దగ్గరైన ఆలోచన అని తెలిపారు. ప్రేమతో కూడిన కుటుంబ వాతావరణం, వైద్య సహాయం, ప్రకృతి మధ్య జీవించే అవకాశం ఈ కేంద్రంలో ఉంటాయి. ఇక్కడ ప్రతి ఒక్కరూ నేర్చుకోవచ్చు, పని చేయవచ్చు, స్నేహితులను సంపాదించుకోవచ్చు, పండుగలు, వేడుకల్లో పాల్గొనవచ్చు అని ఆమె పేర్కొన్నారు. తమ పిల్లల భవిష్యత్తులో తమ తర్వాత ఎవరు చూసుకుంటారోనని ఆందోళన చెందే తల్లిదండ్రులకు ఈ కేంద్రం భరోసా కల్పించాలన్నదే తన ఆశయమని, ప్రతి వయసులోనూ ప్రతి ఒక్కరూ గౌరవంతో, ఆశతో జీవించే అవకాశం పొందాలని ఆకాంక్షించారు. సెరెబ్రల్ పాల్సీ, ఆటిజం, ఎపిలెప్సీ, అభివృద్ధి సంబంధిత వైకల్యాలు, సంక్లిష్ట ఆరోగ్య సమస్యలతో బాధపడుతూ నిరంతర ప్రత్యేక సంరక్షణ అవసరమైన వారికి ఈ కేంద్రం అండగా నిలవనుంది.
