ఆంధ్రప్రదేశ్లో తుపాను ప్రభావంతో నష్టపోయిన ప్రజలకు ప్రభుత్వం అండగా ఉంటుందని ముఖ్యమంత్రి చంద్రబాబు నాయుడు భరోసా ఇచ్చారు. బాధిత కుటుంబాలకు అవసరమైన సహాయాన్ని అందిస్తామని, పంటలు, ఇళ్లు, విద్యుత్ వ్యవస్థకు జరిగిన నష్టాన్ని అంచనా వేసి పరిహారం అందిస్తామని ప్రకటించారు.
తుపాను ప్రభావిత ప్రాంతాల్లో సాధారణ పరిస్థితులు నెలకొనే వరకు అధికారులు క్షేత్రస్థాయిలోనే ఉండాలని ముఖ్యమంత్రి ఆదేశించారు.
మృతుల కుటుంబాలకు రూ.5 లక్షల పరిహారం
తుపాను సంబంధిత ఘటనల్లో మరణించిన ఐదుగురి కుటుంబాలకు ఒక్కొక్కరికి రూ.5 లక్షల చొప్పున ఎక్స్గ్రేషియా ప్రకటించారు. సహాయక శిబిరాల్లో ఉంటున్న బాధితులకు ఒక్కొక్కరికి రూ.1,000 ఆర్థిక సాయం అందించనున్నట్లు తెలిపారు.
ఇళ్లలోకి వరదనీరు చేరి నష్టపోయిన కుటుంబాలకు 25 కిలోల బియ్యం పంపిణీ చేయనున్నారు. చేనేత కార్మికులు, మత్స్యకారులకు 50 కిలోల బియ్యంతో పాటు కిలో చొప్పున ఉల్లిపాయలు, కందిపప్పు, వంటనూనె అందించనున్నట్లు వెల్లడించారు.
రైతులకు పంట నష్టపరిహారం
తుపాను కారణంగా అరటి, టమాటా, పత్తి, చెరకు తదితర పంటలకు నష్టం వాటిల్లింది. వ్యవసాయ, ఉద్యానవన శాఖల అధికారులు క్షేత్రస్థాయిలో పంట నష్టాన్ని అంచనా వేయాలని ముఖ్యమంత్రి సూచించారు. నష్టపోయిన రైతులకు పరిహారం అందించేలా చర్యలు తీసుకుంటామని తెలిపారు.
అరటి పంటకు హెక్టారుకు రూ.35 వేలు, టమాటా పంటకు రూ.25 వేలు చొప్పున సాయం అందించే ప్రతిపాదనలను ప్రభుత్వం పరిశీలించింది. ఇతర పంటలకు కూడా నష్టాన్ని బట్టి పరిహారం అందించే అంశాన్ని పరిశీలిస్తున్నట్లు ప్రకటించారు.
