మద్దూరు, 2026-11-21
ప్రజాప్రతినిధుల పట్ల గౌరవం లేకుండా వ్యక్తిగత దూషణలకు దిగడం ప్రజాస్వామ్య విలువలకు విరుద్ధం: కాంగ్రెస్ సర్పంచులు
భువనగిరి పార్లమెంట్ సభ్యుడు చామల కిరణ్ కుమార్ రెడ్డిపై అనుచిత వ్యాఖ్యలు చేసి, దూషించిన సిద్దిపేట మున్సిపల్ మాజీ చైర్మన్ కడవేర్గు రాజా నర్సుపై తగిన చర్యలు తీసుకోవాలని మర్మాముల సర్పంచ్ సుందరగిరి సత్యనారాయణ గౌడ్, గాగిల్లాపూర్ సర్పంచ్ ఇట్టబోయిన కనకచంద్రం డిమాండ్ చేశారు. శనివారం మండల కేంద్రంలో వారు విలేకరులతో మాట్లాడారు. ప్రజాప్రతినిధుల పట్ల గౌరవం లేకుండా వ్యవహరిస్తూ, వ్యక్తిగత దూషణలకు దిగడం ప్రజాస్వామ్య విలువలకు విరుద్ధమని వారు పేర్కొన్నారు. ప్రజల ఓట్లతో ఎన్నికైన పార్లమెంట్ సభ్యుడిపై ఇలాంటి వ్యాఖ్యలు చేయడం సమంజసం కాదని కాంగ్రెస్ నాయకులు అభిప్రాయపడ్డారు. రాజకీయాల్లో భిన్నాభిప్రాయాలు సహజమని, ప్రజాస్వామ్యంలో విమర్శలకు అవకాశం ఉన్నప్పటికీ వ్యక్తిగత దూషణలు, అనుచిత వ్యాఖ్యలు చేయడం తగదని వారు హితవు పలికారు. రాజకీయ విమర్శలు ప్రజా సమస్యలు, అభివృద్ధి అంశాలకే పరిమితం కావాలని సూచించారు.
ఎంపీ చామల కిరణ్ కుమార్ రెడ్డిపై చేసినట్లు ఆరోపణలు ఎదుర్కొంటున్న వ్యాఖ్యలపై సంబంధిత నాయకులు, అధికారులు స్పందించి తగిన చర్యలు తీసుకోవాలని వారు కోరారు. భవిష్యత్తులో ఇలాంటి ఘటనలు పునరావృతం కాకుండా చూడాల్సిన బాధ్యత రాజకీయ పార్టీల నాయకులపై ఉందని వారు అన్నారు. ప్రజాప్రతినిధుల గౌరవానికి భంగం కలిగించే విధంగా వ్యవహరించే వారిపై చట్టపరమైన చర్యలు తీసుకోవాలని వారు డిమాండ్ చేశారు. విమర్శలకు ప్రతీ విమర్శలు చేయడం తమకు తెలుసని వారు అన్నారు. ఈ కార్యక్రమంలో మర్మాముల జిల్లా కార్యదర్శి పుల్లూరి రాజు, యూత్ కాంగ్రెస్ మండల అధ్యక్షుడు మహేష్, మండల ఉపాధ్యక్షుడు జీడికంటి సురేష్, నాయకులు ఫసి అహ్మద్, ముంతాజ్ అహ్మద్, సుంకోజు శ్రీశైలం, అల్ద ఐలయ్య, బంగ్లా సుధాకర్ రెడ్డి తదితరులు పాల్గొన్నారు.


